Мэдээ

          Дэлхийн эрүүл мэндийн байгууллагын тайлан мэдээгээр нийт өвчлөлийн аравны нэгийг осол гэмтлийн өвчлөл эзэлж жил бүр 5.2 сая гаруй хүн осол гэмтлийн улмаас амь насаа алдаж байгаа бөгөөд 2020 онд осол гэмтлийн улмаас нас барах хүний тоо 8.4 саяд хүрэх магадлалтай байна.

         

Осол гэмтлээс шалтгаалсан нас баралтыг эндэх ёсгүй эндэгдэл буюу урьдчилан сэргийлэх бүрэн боломжтой эндэгдэл хэмээн үздэг. Монгол Улсад нийт осол гэмтлийн 86.6 хувийг санамсаргүй осол гэмтэл эзэлдэг. Сүүлийн 5 жилд осол гэмтлийн дараах шалтгаанууд тэргүүлж байна. Гэмтлийн гол шалтгаан болох унаж гэмтэх гэмтэл нь бүх насны бүлгийн хүмүүсийн гэмтэж бэртэх  шалтгааны 1-рт орж байгаа бол 2-р шалтгаан  нь 0-4 насанд түлэгдэлт, 5-19 насанд зам тээврийн осол, 20-39 насанд хүчирхийлэл, 40-44 насанд амьгүй механик хүчинд өртөх осол орж байна.

 

Гэмтэл согог судлалын үндэсний төвийн 2017 оны тоо мэдээгээр нийт гэмтэгсдийн 31.2% /26615/ нь орон гэртээ осолд өртөж эмнэлгийн тусламж үйлчилгээ авсан бол сүүлийн 5 жилд нас барсан тохиолдлын 34.8% нь буюу 3 хүн тутмын 1 нь гэр орон, ахуйн нөхцөлд осолд өртөж нас баржээ.

 

Иймд ахуйн ослоос урьдчилан сэргийлэх чиглэлээр хүн амын мэдлэг, хандлагыг өөрчлөн зохистой зан үйлийг төлөвшүүлэх зорилгоор Монгол улсын Засгийн газрын 224 дүгээр тогтоол, “Oсол гэмтлээс сэргийлэх өдрийн хүрээнд 2018 оны 01-р сарын 17-ны өдрөөс 02-р сарын 28-ныг хүртэл “Миний гэр аюулгүй орчин уриатай” ахуйн ослоос сэргийлэх 1 сарын аяныг  Эрүүл Мэндийн Яам, Боловсрол соёл шинжлэх ухаан спортын яам, Гэр бүл хүүхэд, залуучуудын хөгжлийн газар, Гэмтэл согог судлалын үндэсний төв, Улаанбаатар хотын Захирагчийн ажлын алба, Нийгмийн эрүүл мэндийн үндэсний төв, Нийслэлийн эрүүл мэндийн газар, Нийслэлийн боловсролын газар, Нийслэлийн онцгой байдлын газар болон бусад байгууллагатай хамтран зохион байгуулах гэж байна.

 

Энэхүү үйл ажиллагааны гол зорилго нь гэр орон, ахуйн нөхцөлд хайхрамж болгоомжгүй байдлаас үүдэх осол гэмтлийг бууруулах, хүн амын мэдлэг, хандлагыг өөрчлөн зохистой зан үйлийг төлөвшүүлж, ахуйн ослоос урьдчилан сэргийлэх зорилготой.

 

Аяны хүрээнд хийгдэх үйл ажиллагаа:

  • Хэвлэлийн бага хурал 01-р сарын 17-ны өдөр 10.00 цагт Эрүүл мэндийн яамны хурлын А танхимд
  • Сургуулийн багш, нийгмийн ажилтан, эмч нарт ахуйн осол гэмтлээс сэргийлэх чиглэлээр сургалтыг зохион байгуулах
  • Өрхийн эмч, сувилагч нарт ахуйн ослоос сэргийлэх, эрсдэлт хүчин зүйлийг үнэлэх чиглэлээр сургалт зохион байгуулах
  • Тохижилт үйлчилгээний ажилтнуудад ахуйн осол гэмтлээс сэргийлэх чиглэлээр сургалт зохион байгуулах
  • Ахуйн ослоос урьдчилан сэргийлэх чиглэлээр богино хэмжээний 1 шторк хийж, олон нийтийн сүлжээгээр түгээх
  • Ахуйн ослоос сэргийлэх мэдээлэл сурталчилгааны багцыг байгууллагынхаа вэб сайт, Facebook-д аяны хугацаанд байршуулж олон нийтэд түгээх
  • Самбар, лед самбар, JCDecaux дэлгэцүүдэд аяны хугацаанд мэдээлэл сурталчилгааны материал, шторкуудыг байрлуулж, түгээх

 

  • 21 аймаг, 9 дүүрэг харьяа газар, хэлтсүүдэд аян зохион байгуулах талаар албан тоот илгээх

 

 

Санал асуулга